Dagoeneko ikusgai dago Tolosako Irisgarritasun Planaren diagnostikoa Udalaren webgunean. Plan honen berrikuspenak, herritarrek eta herriak dituzten beharrak mahaigaineratzen ditu, bai etorkizunekoak eta baita gaur egungoak ere.
Bi saio egin dituzte Irisgarritasun Planaren diagnostikoa berregituratzeko. Azkeneko horretan, Ingartek Aholkularitza eta Mugikortasun eta Garraio Ingeniaritzak eta Adibil, energia eraginkortasunari lotutako enpresak osatutako diagnostikoaren azalpenak eskaini ziren, eta ondoren, bertaratutako herritar eta eragileen iritzi eta ekarpenak jaso ziren.
Egungo zein etorkizuneko irisgarritasun beharrei erantzutea helburu
20 urte ditu orain arte indarrean egon den Irisgarritasun Planak. Egungo eta etorkizuneko errealitate eta beharretara egokitzea xedea izanik, herriko kale eta eraikin publikoen irisgarritasun-maila berrebaluatu dute. Horretarako, herritarren eta eragileen parte-hartzea ezinbestekotzat jo dute.
Irisgarritasun Planaren berrikuspen eta eguneraketa lau esparrutan oinarrituta dago: erabilera publikoko eremuak, garraioa, komunikazioa eta eraikin publikoak. Prozesuaren inguruko informazio guztia eta aurrez aipaturiko diagnosia https://partaidetza.tolosa.eus/eu/ webgunean ikus daiteke.